Dános tanta preguiza preparar a cea que coa cantidade suficiente de azucre seriamos capaces de comernos calquera merda, pensar que está boa e defendela contra vento e marea. Non sexades bárbaros, cociñade! Cociñar non é seguir unhas instrucións, nin someternos a unha lista de ingredientes, nin planificar minuciosamente a compra do supermercado. Ao contrario, cociñar é todo aquilo que pasa nas marxes dunha receita: é improvisar, arriscar, decidir. Cociñar é ser libres. Contra a extinción deste atrevemento, contra a síndrome do non-teño-tempo e a barbarie dunha sociedade que come pero non cociña, este libro úrxenos para recuperar o sentido do acto máis primixenio da vida: alimentarnos.